MANILA- Ibinida ni Philippine Red Cross Chairman, Sen. Richard Gordon ang bagong barko ng organisasyon sa opisina ng Philippine Navy, sa Roxas Boulevard nitong Lunes ng umaga.

Ang barko na pinangalanang M/V Amazing Grace ay wala umanong katulad sa bansa, na siyang pinakamalaki at pinaka-modernong humanitarian vessel.

Taong 2010 sa ilalim ng administrasyon ni dating pangulong Barack Obama ng Estados Unidos nang mabuo ang protoype na vessel, sa halagang $85 milyon na gagamitin sana sa pagbiyahe ng mga tanke at sundalo.

Ngunit hindi ito nagamit ng Amerika at ipinarada lang sa Alaska.

Nabili ito ng PRC sa halagang $1.7 milyon at gumastos naman ng $4 milyon para dalhin ito sa bansa.

Ayon kay Gordon, malaking tulong ang barko, lalo’t madalas tamaan ng bagyo at kalamidad ang bansa.

Maaaring gamitin ang vessel para sa rapid transport, relief operations, command post, humanitarian education, hospital ship, sea rescue at para logistics.

Nagpasalamat rin si Gordon sa patuloy na suporta ng lahat ng kanilang donors at volunteers.